काठमाडौं, साउन १२ — सुनसरीको देवानगञ्ज गाउँपालिका–३, कप्तानगञ्जमा भएको हिंसात्मक घटनाको विरोधमा राष्ट्रिय एकता दलले काठमाडौंमा प्रदर्शन गर्दै सरकारलाई २४ घण्टे अल्टिमेटम दिएको छ। दलले आफ्ना मागहरू निर्धारित समयभित्र सम्बोधन नभए अध्यक्ष विनय यादव भोलिदेखि आमरण अनशनमा बस्ने घोषणा गरेको छ।
प्रदर्शनपछि आयोजित कोणसभामा बोल्दै पार्टीका नेताहरूले घटनाको निष्पक्ष छानबिन, दोषीमाथि कानुनबमोजिम कडा कारबाही र पीडितलाई न्याय दिन सरकारसँग माग गरेका छन्। उनीहरूले सरकारले समयमै ठोस कदम नचाले आन्दोलनलाई थप सशक्त बनाइने चेतावनी दिएका छन्।
प्रदर्शनमा सहभागीहरूले विभिन्न प्लेकार्ड र ब्यानरसहित सरकारको ध्यानाकर्षण गराउँदै सुनसरी घटनाले धार्मिक सहिष्णुता, नागरिक सुरक्षा र कानुनी शासनमाथि गम्भीर प्रश्न उठाएको बताएका थिए। वक्ताहरूले घटनाको सत्यतथ्य सार्वजनिक गरी दोषीलाई कानुनी दायरामा ल्याउन तथा पीडित परिवारलाई शीघ्र न्याय र राहत उपलब्ध गराउन सरकार प्रतिबद्ध हुनुपर्नेमा जोड दिएका थिए।
प्रदर्शनका क्रममा राष्ट्रिय एकता दलले सरकारसमक्ष आफ्ना मागहरू पनि सार्वजनिक गरेको छ। दलले मृतकलाई शहीद घोषणा गर्न, घाइतेहरूको पूर्ण उपचारको व्यवस्था गर्न, जिहादीलाई फाँसी दिने कानुन बनाउन, रोहिङ्या र बङ्गाली शरणार्थीलाई देश निकाला गर्न, मुस्लिम आरक्षण खारेज गर्न तथा मुस्लिम आयोग विघटन गर्न माग गरेको छ।
यसैगरी, वक्ताहरूले सुनसरी घटनाको निष्पक्ष अनुसन्धानका लागि उच्चस्तरीय छानबिन समिति गठन गर्न, दोषीमाथि कडा कारबाही गर्न तथा पीडित परिवारलाई उचित राहत र क्षतिपूर्ति उपलब्ध गराउन माग गरेका छन्। राज्यले कुनै पनि घटनामा पक्षपात नगरी कानुनको समान कार्यान्वयन गर्नुपर्ने उनीहरूको भनाइ थियो।
दलले २४ घण्टाभित्र आफ्ना मागहरू सम्बोधन नभए अध्यक्ष विनय यादव आमरण अनशनमा बस्ने र त्यसपछि पनि माग पूरा नभए देशव्यापी आन्दोलनका थप कार्यक्रम घोषणा गरिने जनाएको छ।
प्रदर्शन शान्तिपूर्ण रूपमा सम्पन्न भएको थियो। सुरक्षा व्यवस्था कडा पारिएको भए पनि कुनै अप्रिय घटना भएको जानकारी छैन। समाचार तयार पार्दासम्म प्रदर्शनमा उठाइएका माग र २४ घण्टे अल्टिमेटमबारे सरकारको औपचारिक प्रतिक्रिया सार्वजनिक भएको छैन।